07.12.2015 21:00 - 08.12.2015 01:00
На 7 декември во Метрополис Арената во Скопје официјално беше затворено 17. издание на ТАКСИРАТ.Завршната прослава на фестивалот ја отвори групата Sabaton, по која следуваа и настапите на Laibach, La Pegatina, 2Cellos, С.А.Ф. & Тони Китановски Little Big Band и Modestep.
Со долгоочекуваниот прв настап пред македонската публика, SABATON ја отвори главната вечер на ТАКСИРАТ.
Атмосферата веќе беше одлична, а по нивниот настап, Метрополис Арена татнеше во звукот на маестралните и единствени LAIBACH и нивниот перфектен перформанс кој покрај музиката, беше надополнет и со визуелни детали и видео проекции.
Следни беа шпанците LA PEGATINA кои ја разиграа публиката со својот енергичен ритам и жесток настап. Членовите на групата воодушевени од атмосферата по нивниот сет се симнаа со своите инструменти меѓу публиката и заедно ја продолжија забавата.
Светската атракција 2CELLOS имаше одличен настап и избор на нумери.
Легендите на македонскиот хип хоп С.А.Ф. со ТОНИ КИТАНОВСКИ Little Big Band,имаа одличен настап кој постојано беше проследен со овации од публиката која прв пат имаше прилика да го чуе култниот албум „Сафизам“ изведен во придружба на бенд.
Крајот на вечерта беше резервиран за енергичниот DJ дабстеп сет на извонредната лондонска група MODESTEP сѐ до раните утрински часови.
Само главната вечер на ТАКСИРАТ успеа да привлече околу 7000 посетители. Оваа година ТАКСИРАТ фестивал подготви многу дополнителни активности и настани на кои публиката имаше ретка прилика да се забавува. Атрактивните имиња и дополнителната програма совршено ја надополнуваа музичката понуда која се одвиваше изминативе 10 дена на три различни локации. Во некои од овие денови истовремено се одржуваа и по три различни настани, а секој од публиката на ТАКСИРАТ можеше да го пронајде своето омилено место и настан за забава или уживање.
17. издание на ТАКСИРАТ пречека скоро 60 изведувачи од над 26 земји во Европа, актуелни ѕвезди и оние кои допрва ќе блеснат на музичката сцена, а сите тие во рамки на: меѓународната ПИН музичка конференција,ЛУЗЕР ФЕСТ, концертот на РУНДЕК КАРГО ТРИО, настанот за пензионери РЕТРО МАТИНЕ, стендап шоуто ЃУРОЛОГИЈА, настаните TAKSIRAT VOLUNTEERS DAY и 20 ГОДИНИ ТЕ САКАМ со PMG Collective, концертот на 2CELLOS и главната вечер на ТАКСИРАТ 17!
Повеќе од 18.000 посетители ги посетија десетте дена на ТАКСИРАТ ФЕСТИВАЛ.