13.01.2016 10:00 - 16.01.2016 20:00
Јубилејното 30-то издание на Eurosonic Noorderslag фестивалот се одржа во Гронинген, Холандија, од 13 до 16 јануари. Европската музичка платформа остана верна на својата идеја за стимулирање на циркулацијата на европската музика, преставувајќи 345 европски надежни изведувачи од кои 34 беа од 14 држави во рамките на регионот на Југоисточна Европа, меѓу кои и Македонија.
Имено, регионот на Централна и Источна Европа беше фокус територија на овој фестивал за 2016. Така, своја шанса да се претстават добија 34 изведувачи од 14 земји, меѓу кои June од Македонија, Дубиоза Колектив од БиХ, Hornsman Coyote & Soulcraft од Србија, Jonathan од Хрватска.
Eurosonic е едно од клучните места за промоција на новите таленти, а само во последните години претставуваше отскочна штица за музичари како Bastille, Adel, Emeli Sande и John Newman. Фестивалот исто така е можност да се состанат претставниците на големите европски фестивали и да се договорат хедлајнерите за тековната година.
Во рамките на фестивалот над 4.000 професионалци од над 40 земји учествуваа на Eurosonic конференцијата и на Европската конференција за продукциски иновации.
Фестивалот започна на 13 јануари вечерта со доделувањето на European Border Breakers Awards. Свечената церемонија беше отворена од потпретседателот на Европската комисија Frans Timmermans, кој исто така ја врачи и EBBA наградата од публиката на бендот Carnival Youth.
На 14 јануари Eurosonic Noorderslag, во соработка со Европската радиодифузна унија ја лансираа European Border Breakers листата. Оваа неделна листа базирана врз највртените нумери во европските земји ќе ги мониторира новите европски изведувачи кои добиваат радиски простор вон границите на матичните држави.
На 43 локации низ Гронинген, 345 надежни изведувачи се претставија себеси пред публиката составена од музички професионалци и други музички љубители. Потоа, ETEP фестивалите ја претставија првата селектирана листа на изведувачи кои ќе бидат букирани за нивните претстојни изданија. Изведувачите со најмногу гласови беа Дубиоза Колектив од БиХ, а по нив следеа Blossoms и NAO од Британија и John Coffey од Холандија.
Колку настапот на Eurosonic може да биде значаен во кариерата на еден изведувач говори и изјавата на претставник на Yourope: “Ги прашавме сите европски фестивалски членови на Yourope да откријат кои нови изведувачи биле вистинско откровение во рамките на фестивалската сезона. 85% од нив настапија на Eurosonic во 2015.“
Годинава од новите европски надежи свој настап, меѓу другите имаа Alvaro Soler, Dua Lipa, Lost Frequencies, Kovacs, Alle Farben, Graham Candy.
Јубилејното издание на Eurosonic предизвика голем интерес кај медиумите. На фестивалот и конференциите присуствуваа 425 новинари од голем број земји ширум светот.
Следното издание на фестивалот ќе се одржи од 11 до 14 јануари 2017 во Гронинген.